خولي الجنينه - الجزء الخامس

الجزء الخامس

عطى علي العنوان اللي حايخدهم منه لكمال و المعاد و بعد كده قفل التليفون و دفع لعم خليل تمن المكالمه و مشى و حسن معاه و هو مش فاهم حاجه و كان عايز يفهم فيه أيه لكن مش عارف يسأل يقول أيه !


علي : أنا عارف أنك عايز تسأل ؟ و أنا حجوبك على أسألتك كلها . في خطه في دماغي بس مش ممكن ننفذها من غير مساعدة أصحابي . المهم أنك تكون مستعد تعمل أي حاجه عشان تاخد حقك .

حسن (بجديه) : طبعاً . آني (أنا) مستعد أموت حتى .

علي (بابتسامه) : جميل . المهم نعرف كل حاجه عن ... هو أسمه أيه ؟

حسن : سي عصمت .

علي : أه . عصمت ، لا زم نعرف كل حاجه عنه ، و دي مهمة أصحابي ، و طبعا لازم أنت كمان تتجهز و أنا عارف أن كمال هو اللي يقدر يجهزك لكده ، بس الأهم أنك تعرف تنفذ مهمتك صح .

حسن (بتعجب) : و لو أني مش فاهم حاده (حاجه) ، لكن أكيد ححاول .

علي (بابتسامه) : جميل جداً . دلوقتي لازم نفكر في حاجه نقولها لعمي عشان نقدر نخرج بكره .

حسن (بقلق) : أه ، مشكله . (فكر شويه) خلاص لجيت (لقيت) الحل . حجوله (حقوله) أن أحنا حنشتري حدات (حجات) من الجريه (القريه) اللي دنبنا (جنبنا) .

علي (بسعاده) : يا سلام على أفكارك . هو ده الكلام . أيامك حتبقى سودا يا عصمت .


---------------------


رجع حسن لشغله و علي روح البيت و عدى اليوم عادي .

تاني يوم قال حسن لأبوه الحجه اللي أخترعها فأبوه صدقه و سابهم يخرجوا . ركبوا الأتوبيس لحد منطقه معينه و لما نزلوا لاقوا كمال مستني بالعربيه فراحوا عنده .


علي (بابتسامه) : دايماً بتيجي في معادك (حضنه) .

كمال (بابتسامه واسعه و سعيده) : لا يمكن أتأخر عليك (حضنه بقوه) . أحنا أكتر من أصحاب .

علي (بعد عن حضنه و بص في وشه) : متشكر أوي على مجيئك و على المساعده اللي حتعملها لأبن عمي .

كمال (مسك كتف علي) : ماتقولش كده يا علي ، مافيش بينا شكر . (بص لحسن و بابتسامه) تشرفت بمقابلتك . أنا كمال صديق و زميل علي لمدة أربع سنين الجامعه (ساب كتف علي و مد أيده يسلم عليه) .

حسن (بابتسامه خجوله) : الشرف ليا (سلم عليه) . أنا حسن أبن عمه .

علي : دلوقتي نروح عندك البيت و ححكي لك على كل حاجه .

كمال (بابتسامه) : أوكي .


ركبوا العربيه و خلال نصف ساعه كان كمال و علي بيتكلموا عن الوقت اللي ماحدش فيهم شاف التاني لحد ما وصلوا البيت . نزلوا من العربيه و دخلوا العماره اللي ساكن فيها كمال و طلعوا بالأسانسير للدور اللي ساكن فيه كمال و دخلوا الشقه بتاعته .


---------------------


لما دخلوا الشقه اللي كانت كبيره شويه و شيك خالص و ذوقها جميل دخلوا أوضة المعيشه على طول و قعدوا على الكراسي و جاب كمال لهم عصير يشربوه . قعد كمال جنبهم و علي حكى له الحكايه عن عصمت المغرور اللي بـيعامل الناس بتعالي و بـيهين الناس و على اللي عمله مع حسن و قال له أنه عايز ينتقم منه و يعرفه أن الفقرا لهم مشاعر و عشان يعرف يتعامل مع الناس الغلابه و قاله أنه محتاج مساعدة أصحابه التانين . أتصل كمال بهم عشان يجوا و يعرف رأيهم فبعد ربع ساعه وصلوا عند كمال و سلموا على علي بابتسامه عريضه و سلموا على حسن و حكى على لهم الحكايه و الخطه و المطلوب منهم ينفذوه فعجب الشباب كلهم الحكايه و المغامره و قرروا كلهم ينفذوا الخطه و مع أن حسن كان قلقان و خايف من الخطه دي لكن هو كان عايز ينتقم منه فقرر ينفذ الخطه . نزل هاني و مدحت عشان يعرفوا كل حاجه عن عصمت و فضل علي و كمال يفكروا أزاي حيجهزوا حسن .


هاني عنده 22 سنه من نفس عمر علي و كمال و مدحت ، طوله متوسط و عينه عسلي فاتح و شعره أسود بخصلات بني و جسمه رفيع بس مش نحيف جداً و مش أبيض أوي و فيه سمره خفيفه ، كان من شلة علي و كمال و مدحت لمدة أربع سنين و عشان كده فضلوا مع بعض أصدقاء .

مدحت عمره 22 سنه ، بنفس طول و جسم هاني و عينه بني فاتح و شعره بني غامق و أبيض شويه أكتر من هاني .


بعد ساعتين روح حسن و علي عشان ما يتأخروش و أتفقوا يستنوا كام يوم عقبال ما يقدروا هاني و مدحت يجمعوا المعلومات كلها و كمال حيتصل بعم خليل اللي حيبعت لهم عيل يقولهم لما حد يتصل بهم .

مر أربعة أيام و علي كان قلقان جداً و هو منتظر الاتصال ده و حسن كان قلقان هو كمان بس مش عشان متشوق لتنفيذ الخطه و بس لاء كمان عشان كان متردد و خايف لأن الموضوع مش سهل أبداً و لو اتكشفوا ممكن الموضوع ده يتسبب في مشاكل لأبوه و ممكن كمان يترفد و ده اللي كان قلقه جداً . رغم أن حسن من المفروض أنه يتردد كمان عشان حبه لعصمت لكن قلبه كان لسه مكسور بسبب اللي عمله و كان جواه كره كبير جداً له و قلبه كان قاسي من ناحيته و هو ده اللي كان مخليه عايز ينفذ الخطه .


--------------------


حسن كان قاعد في الجنينه على الزرع و علي كان قاعد جنبه و بيتغدوا مع بعض و بيدردشوا و يضحكوا لحد ما جيه حصان من بعيد بيجري بسرعه و ده خلاهم يبصوا عليه بتمعن و عرفوا اللي راكب الحصان لما قرب منهم و بدأ يهدي السرعه عشان يقف و اتضايقوا جداً و اتخنقوا و حاولوا يعملوا نفسهم مش واخدين بالهم جايز يمشي . وقف الحصان و نزل من عليه و قرب منهم و وقف قصادهم فاضطروا يقفوا بسرعه فقرب أكتر منهم و ابتسم لهم .


كاظم : أيه ؟ سبتوا الأكل ليه ؟ كملوا غداكم أنا مش جاي أعطلكم .

حسن : أهلاً يا سي كاظم نورت الدنينه (الجنينه) .

كاظم (قرب منه أكتر) : أهلاً بالأمور . (طلع منديل و بيمسح وش حسن) دايماً كده وشك مليان طينه ، (بابتسامه) كان لازم تمسحها لأنها بتخبي وشك الجميل . رغم أن وشك جميل حتى و لو عليه طينه .

حسن (أتكسف و اتخنق) : مافيش داعي يا سي كاظم لتعبك ده (بيحاول يبعد أيده) . وشي حيتوسخ تاني لأن شغلتي اكديه (كده) .

كاظم (بعد بأيده التانيه أيد حسن و مسكها) : برضو لازم أمسحه . (بص لعلي) بص كده أبن عمك العسول وشه نضيف أزاي و زي القمر رغم أنه بيشتغل معاك ساعات لكن دايماً لما بَعدي عليكم بيكون أخر شياكه و جمال (بابتسامه جذابه) . يا بختكم ببعض .


علي لما شاف نظراته أتخنق و بص الناحيه التانيه إما حسن فكان بيحاول يبعد عنه بهدوء لأنه كان خايف يستخدم القوه . كاظم كان عمال يبص على حسن بعيون كلها طمع و رغبه و ده خلى حسن يتوتر و يقلق أكتر .


حسن (بتوتر) : يا سي ... كاظم ، سي ... عصمت ... حيوصل في أي لحظه ... و ... و مش حيكون تمام لو ...

كاظم : ههههه ماتقلقش ، عصمت في النادي و مش حيجي دلوقتي خالص ، هو لما بيكون مع الخيل بينسى الدنيا كلها ، يعني مش حيكون زي كل مره ههههه . أيه ماوحشتكش و اشتقت ليا و لو شويه ؟


حسن ماكنش قادر يرد عليه و يقول أيه و كان متوتر و خايف و بالذات لما عرف أن عصمت بعيد لأن كده مافيش حاجه تمنع كاظم من تحرشاته أو أكتر كمان من تحرشات . علي أخد باله من قلق حسن و خوفه فقرر يبعد كاظم عنه . قرب علي من كاظم و حسن و مسك أيد كاظم و بعده عن حسن و ده خلى كاظم يستعجب جداً و يبص له بتعجب شديد و حسن كمان أستعجب أوي بس ارتاح لما علي عمل كده .


علي (بنظرة احتقار) : أعتقد مش حلو في حقك لما يجي حد من الفلاحين و يشوفك بتعمل كده .

كاظم (مسك أيد علي) : ليه ؟ (بابتسامه) هو أنا عملت حاجه غلط .

علي (بعد أيده بغضب) : .......


فضل علي و كاظم يبصوا لبعض شويه بنظرات تحدي و غضب و ابتسامة كاظم المستفزه لحد ما سمعوا صوت عيل بينادي على حسن .


الولد الصغير : عم حسن ، عم حسن .


بعد حسن عن كاظم و كان مرتبك جداً لكن حاول يبقى هادي قدام الولد اللي جاي يجري من بعيد و وقف قصاده و هو بيتنفس بقوه فابتسم للولد و قرب منه .


حسن : فيه أيه يا محمد ؟

محمد (بيتفس) : فيه تلفون بيسأل عن عم علي و عنك يا عم حسن ؟


بص حسن لعلي فلقى علي بيبص له بنظرة مفاجأه و بعدين ابتسم له فحسن قلق و بدأ قلبه يدق بقوه . كاظم كان مستعجب من موضوع التليفون و النظرات الغريبه اللي بينهم و كان نفسه يعرف فيه أيه . بص علي لكاظم و ابتسم له بطريقه مستفزه و ده ضايق كاظم جداً و ظهر عليه لأنه كشر . بص علي للعيل الصغير و ابتسم له .


علي : طيب يا عسل ، أحنا حنروح معاك .

حسن (بص لعلي بتعجب) : علي !

علي (بص لكاظم) : ده طبعا بعد أذن كاظم باشا ، و لو مافيش كلام تاني حيقوله .

كاظم (بابتسامه تخفي غيظه) : أه طبعا تقدروا تروحوا ، أنا خلصت كلامي ، (بدأ يمشي شويه و بعد كده بص وراه) لكن حنتكلم مره تانيه قريب (بنظره جاده و بعد كده ابتسم بخبث) .


أتخنق علي من نظرته فبعد عينه عنه و كشر و بدأ قلبه ينبض بقوه ، إما حسن فكان قلقان جداً و متوتر و مرتبك و خايف لكن كان فرحان أنه قدر يبعد عن كاظم . مشي علي و حسن ورا الولد اللي وصلهم لحته معينه و سابهم و مشي . وصلوا الأتنين عند عم خليل و سلموا عليه .


خليل (بابتسامه) : التلفون اللي كنتم منتظرينه .

علي : متشكرين يا عم خليل .

خليل : العفو يا وليدي (ولدي) . أتصل لكم عليه ؟

علي (بابتسامه لطيفه) : يا ريت ، و نكون شاكرين جداً .


خليل لما شاف ابتسامة علي الساحره اتكسف و وشه احمر و قلبه دق جامد و ابتسم بخجل و بص بعيد و اتصل بالنمره لحد ما رد عليه كمال .


خليل : اتفضل يا ويلد (ولد) .

علي (أخد التليفون منه و ابتسم له) : شكراً يا عم خليل . (بيكلم كمال) ألو كمال . أيه الأخبار ؟

خليل (بيبص على علي و بيكلم نفسه) : يا بوي على الدمال (الجمال) و الحلاوه . أصغير و أمور جوي (أوي) و يدنن (يجنن) مش زي الغفر الل عندي . يا ريته ماكنش مخطوب ، عليا الطلاق بالتلاته من الاتنين اللي متدوزهم (متجوزهم) ماكنتش سيبته أبداً . يا بختك يا واد يا حسن حتتدوز (حتتجوز) الملبن و المهلبيه ده .

كمال : كله تمام . كل المعلومات عندنا ، و حتى معاد خروجه من بيته و ذهابه للنادي و اللي بيعمله في النادي و أصحابه و الحاجات اللي بيحبها . (بابتسامة ثقه) زي ما وعدتك كله حيتم بسهوله و الخطه حتنجح .

علي (بسعاده) : عارف أني أقدر أعتمد عليك بسهوله . ممكن نبدأ من انهارده .

حسن (بخوف) : انهارده !؟

كمال : طبعا ممكن . حاجي أخدكم بالعربيه دلوقتي عند المكان نفسه اللي أخدتكم منه من كام يوم .

علي : أوكي ، و أحنا حنروح دلوقتي .

حسن (لمس كتف علي): علي !؟

علي (بيكلم كمال) : يلا دلوقتي مع السلامه .

كمال : مع السلامه .

حسن : علي ! أيه الل انت جلته (قلته) ديه (ده) !؟

علي (حط صباعه على بوق حسن) : شششششش ، بعدين (نزل صباعه) .


قفل الخط و بص لعم خليل و ابتسم و طلع الفلوس من جيبه و عطاه الفلوس .


علي (بابتسامه لطيفه) : شكراً يا عم خليل .

خليل (بسعاده) : العفو يا علي . يا ريت تبجوا (تبقوا) تيدوا (تيجوا) تزوروني ... يعني ماتجطعوش (ماتقطعوش) الزياره .

علي (بابتسامه) : طبعاً ، طبعاً . نستأذنك دلوقتي .

خليل (بابتسامه) : مع السلامه .

علي : مع السلامه .


مشي حسن و على و خليل بيبص عليه و على جسمه و معجب جداً بيه . رغم أن خليل متجوز أتنين و عنده ستة أولاد و عمره فوق الأربعين لكن كانت عينه زايغه . رغم أن عين خليل زايغه و ممكن يعاكس لكن عمره ما لمس حد غصب عنه أو أذى حد يعني رجل طيب بس بتاع رجاله .

علي كان ماشي بسعاده و حماس و حسن كان ماشي وراه و هو قلقان و متوتر و باصص في الأرض و كل شويه يبص عليه و يرجع يبص في الأرض كان عايز يتكلم و يقوله أنا خايف بلاش من الخطه دي بس الكلام مش عايز يخرج من بوقه .


علي : أنا متحمس جداً جداً لخطتنا و متأكد أنها حتنجح و حنجيب مناخيره الأرض و حنعرفه الفقير ممكن يعمل أيه و أن الفقير عنده كرامه زيه بالظبط و أن الفقير طيب بس مش أهبل و ممكن ياخد حقه بأيده . أكيد أنت كمان متحمس زيي ، مش كده يا حسن ؟

حسن (بارتباك) : آني (أنا) ..........

علي (بص وراه و باستغراب) : فيه أيه يا حسن !؟

حسن (بتوتر و قلق) : آني (أنا) ... آني (أنا) ...

علي (وقف و راح جنب حسن) : مالك يا حسن !؟ (لمس وشه) قلقان ليه و خايف !؟

حسن (باين على وشه القلق الشديد و الخوف) : مش عارف ليه بس جلجان (قلقان) و حاسس أن أحنا مش حنندح (حننجح) و حيكتشفنا .

علي (مسك وش حسن بأيده الاتنين و ابتسم) : ماتقلقش أنا متأكد من أننا حننجح . و بعدين كلنا معاك . أنت مش لوحدك .

حسن (مسك أيد علي) : بس بوي هو اللي ممكن يترفد و هو ملوش ذنب في الموضوع .

علي (سكت شويه) : ماتقلقش لو حصل أي حاجه و أنا متأكد من أن مافيش حاجه حتحصل أنا اللي حتحمل المسئوليه كامله ، (بابتسامه) فماتقلقش كده ، أهدى و أفتكر كل اللي حصل لك و شفته منه .

حسن (بدأ يفتكر اللي حصل فالقلق راح و ظهر في عينيه الحقد و التحدي) : فاكر اكويس ، و مستعد للانتجام (للانتقام) و مش حضعف .

علي (بسعاده و حماس) : أيوه كده ، هو ده حسن القوي اللي أعرفه . (نزل أيده من على وش حسن) دلوقتي لازم نلاقي حاجه نقولها لعمي عشان نقدر نغيب كام ساعه .

حسن : إيوه لازم ، بس إيه ؟

علي (بعد التفكير و بابتسامه) : أيوه ، لاقيت الفكره .

حسن (بحماس) : إيه ؟

علي : يلا بينا بس و حتعرف ، مش عايزين نتأخر ، كمال حيستنانا .

حسن (بتعجب) : ماشي .


مشيوا الأتنين بسرعه لحد ما وصلوا عند متولي في الغيط و كان قاعد مع الفلاحين بيتكلموا و يضحكوا و أول ما شافهم بص لهم باستغراب فعلي ابتسم له و حسن كان متوتر بس بيحاول مايظهرش .

علي : مساء الخير يا عمي . (بص على القاعدين) مساء الخير عليكم جميعاً .

القاعدين : مساء النور يا ويلدي

متولي (باستغراب) : مساء النور يا علي . فيه إيه ؟ سايبين الدنينه (الجنينه) و داين (جاين) هنا ليه !؟

علي : ممكن يا عمي لحظه .

متولي (بص له بتعجب شديد) : ماشي .


قام متولي و مشى شويه معاهم بعيد عن القاعدين و وقف و بص لهم فحسن بص في الأرض و هو متوتر و قلقان إما علي فكان هادي و ثابت و ماكنش متوتر أبداً .


علي : بعد أذنك يا عمي أنا عايز أروح القريه اللي جنبنا .

متولي (أتفاجأ) : هاه !؟ ليه !؟

علي : محتاج أجيب شوية حاجات محتاجها ضروري .

متولي : آآآآآه عشان اكديه (كده) . طيب و ماله . ناوي تروح ميتى (أمتى) ؟

علي : دلوقتي على طوال .

متولي (بتعجب) : دلوكيتي ! بس أحنا جربنا (قربنا) من العصر . لا لا خليها بكره ماينفعش دلوك (دلوقتي) .

علي : ماتقلقش يا عمي أنا حاخد معايا حسن .

متولي (بص لحسن) : حسن ! طيب اكديه (كده) ممكن اطمن اشويه بس ماتعوجوش (لا تتأخروا) ، ماشي ؟

علي : حاضر يا عمي . (حضنه و باسه) ربنا يخليك لينا يا عمي .

متولي (ابتسم) : هههههه يا خبيث . (حضنه و باسه) و يخليكم ليا يا ولادي .

حسن (ابتسم) : ربنا ما يحرمنا منك يا بوي (حضنه و باس خده) .

متولي (طبطب على ضهر حسن) : يا حبايبي . يلا روحوا بسرعه عشان ماتتأخروش .

علي + حسن (بعدوا عنه و بابتسامه) : حاضر .



خلاص الخطه حتبدأ ، يا ترى حتنجح ؟ و هي أيه أصلاً الخطه ؟ و حسن حيقدر ينفذها و لا حيضعف و يرتبك ؟


مقطتفات من الجزء التالي

كمال : رجعتنا أيام الثانوي و المقالب اللي كنت بعملها . هههههه ماكنتش أعرف أني حرجع تاني للشقاوه .

علي : أيه بقى المعلومات اللي عرفتوها ؟

علي : واضح أن الموضوع مش سهل و فيه تحدي . جميل جداً . أيه رأيك يا كمال ؟

مدحت (بدهشه) : واو ، حسن أنت مفاجأه .

--------------------------

أتمنى الجزء يكون عجبكم

منتظره أرائكم و ملاحظتكم و أستنتاجتكم